JOP

Un autor tan recomendado como descoñecido. Fóbico ás cámaras e maniático dunha vida austera e discreta. Con este mesmo espírito, comedido e intenso, Jim Dodge publica unha novela intelixente e apaixonante sobre a amizade, a familia, a liberdade e a perda do medo ao mundo.

Dodge constrúe unha metáfora fabulada na que reflexiona sobre as barreiras mentais que encerran ao ser humano sobre si mesmo, fronte a medos invisibles e inimigos extraños.

‘Jop’ ergue un canto á xenerosidade e á liberdade a partir de personaxes maxicamente tenros. Ademais, a edición vai acompañada dun bo prólogo, unha entrevista ao autor, e fermosas ilustracións.

Máis información sobre o libro, clicando aquí.

SÁBADO POR LA NOCHE Y DOMINGO POR LA MAÑANA

Unha novela británica da década de 1950, encardinada no movemento dos “Angry Young Men”. O relato dun mozo desencantado co mundo e airado cun sistema económico brutal, e un sistema político cómplice. A actualidade do retrato de Arthur Seaton permite trasladar máis de medio século de escritura ao ano 2011 e ás rúas de Londres. Unha novela social, xénese de toda unha corrente creativa social que aínda chega aos nosos días, cunha actualidade practicamente imperecedeira e intemporal.

Máis sobre a novela, na páxina de Fantasymundo.com, clicando aquí.

SOLARIS

En poucas palabras: obra mestra, imprescindible, universal, e inesquecible. Ou sexa, ‘Solaris’.

Máis sobre o libro, clicando aquí.

LAS ALAS DEL DINOSAURIO

Unha novela chegada de frías terras danesas que, aínda que ten unha trama “negra”, é moito máis un crossover de xéneros ca outra cousa: sentimental, familiar, científica, psicolóxica… As múltiples facetas do texto obrigan a que o lector sinta paixón por todas elas, se non haberá fragmentos que nos fagan sentir entre perdidos e aburridos. A personaxe principal, de Anna Bella, nai moza e doutoranda con problemas, está moi ben trazada, e os secundarios ao seu arredor están tamén ben definidos.

Correcta e sen estridencias, entretén e está moi ben escrita. Por iso o tempo pasa voando, se ben non é unha obra mestra. Con todo, unha lectura de fin de semana edificante e moi ben fundamentada sobre a cuestión científica que articula a trama: ¿son as aves os parentes vivos máis próximos aos dinosauros, ou non?

Máis sobre a novela, clicando aquí.

CUBA. LA LUCHA POR LA LIBERTAD

Un ensaio monumental sobre un tema de actualidade e interese: o pasado, presente e futuro de Cuba. O lector hispano debe ter en conta que este é un ensaio escrito dende unha perspectiva anglosaxona: a “pertenza” castelá da illa dende o s. XVI apenas se trata, e si as relacións británicas e norteamericanas que a illa suma á súa área territorial de influencia aínda dende o s. XVIII. Ademais, o importante tempo castrista retrátase cunha certe subxectividade e sesgo negativo que introducen, ás veces, opinións e interpretacións de curiosa (e dificilmente xustificable, contundencia). Estas dúas advertencias por diante, o ensaio do historiador británico e hispanista Hugh Thomas representa un dos piares da historiografía cubana. Moi interesante.

A crítica completa, como sempre publicada en Fantasymundo.com, podedes lela clicando aquí.

MUERTE DEL INQUISIDOR

Esta é unha novela trampa: pois parece unha investigación histórica, rigorosa e aséptica, pero non o é. ‘Muerte del inquisidor’ (Tusquets, 2011) desvela un caso, efectivamente, pero este caso funciona aquí, principalmente, como escusa. A estraña morte dun crego na Sicilia da inquisición cede o terreo de xogo para unha reflexión de fondo sobre as dualidades esenciais da vida en sociedade: liberdade-opresión, dignidade-sometemento, loita-represión… A documentación e o caso, fundamentados e verídicos, danlle leña a un lume fundamental: o do prezo da liberdade. Recomendo esta novela encarecidísimamente.

Máis sobre ‘Muerte del inquisidor’ (Tusquets, 2011), clicando aquí.

PROGRAMADOS PARA TRIUNFAR

Un ensaio de imprescindible lectura para o momento actual… e aínda despois. Cando os discursos socioeconómicos emerxentes parecen confundir, interesadamente, o “emprendedor” co “individualista”, o “empresario” coa persoa posuidora de “iniciativa”, e converter por tanto a todo individuo en “único responsable do seu destino”, esquecendo barreiras e límites impostos… Unha denuncia tan potente como a de Michela Marzano, tan ben argumentada e fundamentada, merece lerse con atención. Máis sobre o libro, clicando aquí.

POR QUÉ LAS PERSONAS INTELIGENTES COMETEN ESTUPIDECES

Un ensaio sobre a estupidez que nos demostra, outra vez máis, que a “racionalidade” ou a “intelixencia”, aplicadas de forma purista e absoluta, uniformadora e individual, carecen de fundamento. Ninguén está libre de ser un tonto de remate e, ata as persoas máis intelixentes e creídas, sempre caen na tentación da estupidez. Revelador e divertido. Máis sobre o ensaio, clicando aquí.

UNA GUÍA DE LA ANTIGÜEDAD PARA LA VIDA MODERNA

En poucas ocasións un ten a oportunidade de aprender e entreterse ao mesmo tempo. Pois ben, esta é unha desas poucas. A actriz británica Natalie Haynes segue a estela doutros grandes actores metidos a didactas, e coa mesma brillantez có mellor de todos eles, escribe e publica este breve ensaio sobre cómo era (realmente) a vida dos gregos e os romanos. Todo iso, ademais, con leccións curiosas de posible uso contemporáneo: cómo utilizaban a moeda para evitar a especulación, cales eran as estratexias da muller para abrir a fiestra da súa opresión, ou por qué tanta xente lle tiña manía a Sócrates. Rir e saber poucas veces foron máis compatibles. Hai que aproveitalo!

Unha crítica sobre o libro, tédela clicando aquí.

CAMPO DE CONCENTRACIÓN

O seu suicidio foi unha sorpresa para case todos. A morte de Thomas M. Disch deixou na SciFi unha dor fondísima e unha perda irreparable. Da súa pluma saíron algunhas das mellores novelas que se leron no xénero. E a ese pequeno grupo de obras mestras pertence esta nova tradución: de ‘Campo de concentración’ (La Factoría de Ideas, 2011). a súa erudición, intelixencia, paixón e mensaxe imperedeira sobre os límites da coherencia e a dignidade humana será de lembranza aínda durante moito tempo. E como unha novela que perdurará, merece lerse con atención. Máis sobre a novela, clicando aquí.